पुणे : नैऋत्य मोसमी वारे आज (मंगळवारी) अंदमानच्या काही भागात दाखल होणार असल्याचा अंदाज आहेत. तसेच, दक्षिण बंगालचा उपसागर, अंदमान आणि निकोबार बेटावर मान्सून दाखल होण्यास पोषक स्थिती निर्माण झाली असल्याचे हवामान विभागाकडून सोमवारी सांगण्यात आले. 

 

नियोजित वेळापत्रकाप्रमाणे १९ ते २० मे च्या दरम्यान मान्सून अंदमानात दाखल होतो. त्यानंतर सुमारे १ जूनला तो केरळात दाखल होतो. त्यानंतर, मान्सूनच्या पुढील वाटचालीत अडथळा निर्माण न झाल्यास सुमारे ५ ते ७ जून च्या दरम्यान तो तळ कोकणात दाखल होतो. त्यानंतर १० ते १२ जूनच्या दरम्यान संपूर्ण महाराष्ट्र मान्सूनने व्यापत असतो. मात्र, यंदा मान्सून आज अंदमानसह आजुबाजूच्या निकोबार बेटावर दाखल होणार असल्याचा अंदाज आहे. अंदमानात मान्सून दाखल झाल्यानंतर काही अडथळा निर्माण न झाल्यास  २० ते २२ मे दरम्यान तो केरळात दाखल होणार आहे. सुमारे १ जूनच्या आसपास तो तळकोकणात दाखल होऊ शकतो, असा अंदाजही वर्तविण्यात आला आहे.  यंदाच्या कडक ऊन्हाळ्यामुळे जमीन अधिक तापली होती. त्याचाच परिणाम म्हणून कमी दाबाचे क्षेत्र तयार झाले. तसेच, समुद्राचे तपमान जमिनीच्या तुलनेत कमी होते. त्यामुळे अधिक प्रमाणात बाष्प तयार होत गेले. त्याचे रूपांतर अवकाळी पावसात झाले. सद्य:स्थितीत वारे जास्त दाबाकडून कमी दाबाकडे वाहत आहेत. समुद्रातील बाष्प जमिनीकडे येत आहे. हे मान्सूनच्या आगमनाची लक्षणे आहेत. या सर्व गोष्टींचा परिणाम म्हणून यंदा मान्सून वेळेआधीच अंदमानात दाखल होणार आहे.   कोकण, गोवा, विदर्भात दोन दिवस मेघगर्जना व विजांच्या कडकडाटात पाऊस पडणार असल्याचा अंदाज आहे.